Hefteyek şunda li seranserî Iraqê û Kurdistana Başur hilbijartin çêdibe. Partîyên Kurd bi lîsteyek têkilî hilbijartinê dibin. Ev yekitîya ku navbera partîyên Kurd da hatîye sazkirin, hêmû kurdên cîhanê kêfxweş dike. Xewnên wan dixemilîne. Ev rewşa ku kurdên başur tê da, salan berê bo me gelek dur bû, kesî xeyala wê jî nedikir. Deh sal berê navbera partîyên kurda da şer û birakujî hebû, dile gelê kurd wek mîna welatê wî parçe parçe bû. Lê îro, dilê wan, bi kurdê başur ra li Kerkukê, li Hewlêrê û li Silêmanîyê davê.

Têkilîyên partî û serokên Kurdistana Başur, meseleyek ku navbera duh bira da derbas bi bu, anî bîra min.

Sal 1995, li bajareki Almanya di komelekî Kurda da rasti du bira hatim. Her du jî pênaber bûn. Lê birê mezin pasaporta pênaberîyê histandi bû. Birê piçûk, şixulê wî hê ne qedîya bû. Dewleta Alman dixwest wî şunda bîşîne. Ser wê yekê birê piçûk diçe ba abukatê xwe û dixwazê îtirazî biryara dadgeha pênaberîyê bike. Abukatê wî jê ra dibêje:

- Biçe kopîya pasaporta birê xweyê mezin ji min ra bîne. Ezê wî ji dadgehê ra bişînim û bêjim, ev her duh bira jî dê û bavekî ne. Li gundekî da mezin bû ne. Her duh jî ji ber tade û ezîyeta dewleta Tirk revîyane û hatine. Madem kû hun heqê pênaberîyê didin ê mezin, gere hun bidin ê piçuk jî.

Ser wê yekê birê piçûk diçê ba birê xwe. Gotinên abukatê xwe jê ra dibê û kopîya pasaporta wî jê dixwaze. Lê birê mezin daxwaza birê xwe nayne cîh.

Wê rojê di komelê da li ser yekitîya Kurda civînek hatibû amadekirin. Ji bo wê yekê komelê da gelek kes hebûn.

Civîn qedîya. Mirov belav bûn. Lê hinekê wan jî hê li komelê da runiştibûn û bi hev ra sohbet dikirin. Nav wan ev her duh bira jî hebûn.

Birê mezin bi rewşek zanayî gilî û gazinê xwe ji serok û hêzên kurd dikir û digot; “Ew çima nayên ba hew û yekitîyek nettewî saz nakin? Ew çima dibin sebebê şerê birakujîyê? “

Berî vê sohbetê ew mesela ku navbera her duh bira da qewimî bû, min bihîstibû. Ji bo wê yekê min jê ra got:

- Bira, gotinên te basê. Lê navbera serok û hêzên Kurda da bi taybet a Barzanî û Talabanî da parvakirina welatekî seranser heye. Lê navbera te û birê te da çi heye ku hun nikarin duh hev kaxizan parve bikin. Tu naxwazî kopîya pasaporta xwe bi birê xwe ra parva bikî, çawa dikarî bi hêsanî dibê jî bila Barzanî û Talabanî Kurdistanê bi hev ra bê proplem parva bikin.

- Birê min mirovekî ser hişk ê. Min xwest kû bila hinek zahmetîyê bikşine û bila qedr û qimetîya tişta hîn bibe, got.

Ser gotinên wî ez gelek qahirîm û min jê ra got, kîngê ku tu kopîya pasaporta xwe bidê birê xwe, bawer ke wê demê Barzanî û Talabanî jî bikarin werin ba hev û proplemên kû navbera wan da henê, ewê wek birati hal bikin û bi yekitîyek xurt mesela kurdên başur çareser bikin.

Ji wê demê vir da deh sal derbas bû. Lê ew proplema ku navbera her duh bira da qewimî bû, tu ji bîra min dernediket. Hê jî nizanim, gelo birê mezin alîkarîya birê xwe kir an na.

Lê îro ez gelek kêfxweşim. Yekîtîya kû navbera partîyên kurd da çêbûye, roj bi roj xurttir dibe.

Ez bawerim Kurd di vê hilbijartinê da ne tenê parlamena Kurdistan da, li parlamena Iraqê da jî bi hêzek xurt ewê werin temsîlkirin.

Serkeftina wan ji bo kurdên başur mizgînîya Kurdistanek federal an jî serbixwe ye. Lê ji bo me hemû kurdan ra jî bawerîya azadî û aşitîyê ye.

23’ê Çileya Paşin 2005