Mesut Barzanî û heyeta Kurdistanê li ser daweta Serok Georg W. Busch çun Amerîkayê. Ji bo çuyîna wan ji teref Amerîkîyan balafirek eskerî hat tahsîs kirin û ew bi vê balafirê, roja 23.10.2005’da ji Hewlêrê firîyan. Di heyeta Kurdistanê da, serokê hukûmeta herêmî Nêçîrvan Barzanî, Wezîrê plankirinê ê Îraqê Dr. Berhem Salîh û gelek nunerên hukûmetê û nunerên herdu partîyên sereke jî cîh girtibun.

Duh (25/10) piştî nîvro serokê Amerîkayê George W. Bush, li Qesra Sipî serokê herêma Kurdistanê Mesûd Barzanî bi resmî qebûl kir û civîna navbera herdu serokan, di Oval Ofice’da derbas bu, qasî saetekê ajot.

Piştî hevdudîtinê, civîna çapemeniyê hat darxistin. Serokê Amerîkaye George W. Bush, li wir bi germî bixêrhatina Mesûd Barzanî kir. Pesnê xebata Barzanî a li diji diktatorîyê kir û xebata wîya îro ji bo Iraqek azad, demoqrat û federe dike, nîşan da.

Serokê Kurdistanê Mesud Barzanî jî di vê civîna çapemenîyê da bi kurdî axifî û kêfxweşiya xwe bi dîtina serok Bush diyar kir. Bi navê gelê Kurd, ji bo gelê Amerîkayê û hukumeta wî spasîya xwe anî ziman.

Ev ziyareta Barzanî ku li Amerîkayê bi resmî derbas dibe, ji bo gelê kurd gelek girîng û dîrokîye.

Dîrokîya vê ziyaretê ewe ku, cara yekemine serokekî kurd, wek serokê Kurdistanê bi wareki resmî ji teref serokê Amerîkayê va tê dawet kirin û li Qesra Sipî dibe mêvan.
Wek tê zanîn Celal Talabanî jî mehên borî da çubu Amerîkayê û teref Serokê Amerîkayê George W. Bush va li Qesra Sipî hatibu qebul kirin. Lê di wê zîyaretê da Talabanî wek serokkomarê Iraqê cîh girtibu.

Girîngîya ziayaretê jî ewe ku, ev zîyaret ji bo naskirina herêma Kurdistan a Iraqê gava yekemine û ji bo dewletên derdora Iraqê jî mesajeke vekirîye.

Bi taybeti ev mesaj ji dewleta Tirk ra ye, lewra Tirk hê li dijî Iraqek federal derdikevin û di her firsendê da federalîzmê wek sebebê parçebuna Iraqê nîşan didin.

Ji ber vê yekê ye ku ew, hukumeta herêma Kurdistanê hê jî bi resmî nasnakin û di gotinên xwe da serokê herêma Kurdistanê Mesud Barzanî wek serokê PDK’ê binav dikin. Çapemenîya Tirka jî di vî warî da mîna dewletê difikire û di nuçeyên xwe da behsa serokatîya wî ya Kurdistanê nakê.

Serokê Dewleta Iraq a Federal Celal Talabanî jî zîyareta Mesud Barzanî ya Amerikayê ji bo naskirina Kurdistanê gavek dîrokî dibîne. Talabani, di hevpeyvîna ku rojnamevanê Tirk Ilknur Cevîk pê ra çêkirîye, zîyaretê Mesut Barzanî waha şirove dike: „ Serdana serokê Kurdistanê Mesûd Barzanî ya bo Emerîkayê îtiraf û naskirina herêma Kurdistana Iraqê ye û ev cara pêşiyê ye ko serokê herêma Kurdistanê di asteka wiha bilind de ji aliyê serokê Dewletên Yekgirtî yên Emerîkayê ve têt pêşwazî kirin.“

Ev jî mesaja Serokê Iraqê Celal Talabanî ye, ji bo dewletên herêmê.
Wusa tê xuyakirin, ev zîyaret û tesîra wê di rojên pêş da, bi taybetî di rojeva dewletên derdora Iraqê da cîh digre û tê şirovekirin.

Lê netîca wê jî ji îro va tê xuyakirin ku ew jî qebulkirina meşruîyet û resmîyeta Kurdistana Başur e. Tu rêyekî din ji bo wan tune.

26.10.2005

[email protected]