Parlamentoya Kurdistanê di civîna xwe ya îroyîn da (12 Hezîran 2005) ji bo çar salan Mesûd Barzanî wekî serokê Kurdistanê hilbijart. Bi vî karê xweyê dîrokî, daxwaza Ehmedê Xanî ku sêsed sal berê ji bo gelê Kurd xwestibu, anî cîh. Ji îro şunda gelê Kurd êdî ne bê xwedîye.
Ehmedê Xanî di destana Mem û Zîn da li ser belengazî û bê xwedîtîya gelê Kurd wiha nivîsî bû.

„Eger hebûya ji bo me padişahek
Xwedê lîyaq bidîya ji bo wî kulahek

û bihata dîýarkirin ji bo wî wextek
eşkera eşkera dê vebubûya ji bo me bextek

….

em’ê nebûna belengaz û xizan, bindest û bin ferman
zorbirî û stuxwarên Tirkan û Eceman“

Ji vê daxwaza Ehmedê Xanî heta niha gelê Kurd ji ber vê bêxwedîtîyê û bê dewletîyê gelek eş û derd kişand. Welatê wî hat parçekirin. Kilam û stranên wî, ziman û nasnameya wî hate qedexekirin.
Lê îro, li parçeyek tenê be jî gelê Kurd azad e. Xwedî dewlet û xwedî serok e. Sedem vê yekê roja îro, roja 12ê Hezîranê ji bo gelê Kurd rojekî dîrokîye. Parlamentoya Kurdistanê Kek Mesûd Barzanî ji bo serokatîya Kurdistana Başur hilbijart. Lê belê xewna wî, wek mîna xewna gelê Kurd ji Başûrê Kurdistanê mezintir e.
Serokatîya wî li hemû gelê Kurd û seranserê Kurdistanê pîroz be.

12 Hezîran 2005